പ്രിയമുള്ളവരേ,

അതി ശക്തമായ മഴയിലോ വെയിലിലോ നാം ഉപയോഗിക്കുന്ന ദ്വാരങ്ങളുണ്ടാകുകയാണെങ്കിൽ നാം എന്തുചെയ്യും? അതുപോലെ തന്നെയാണ് നമ്മുടെ ഭൂമിയെ പൊതിഞ്ഞു പിടിച്ചിരിക്കുന്ന ഓസോൺ പാളിയ്ക്ക് വിള്ളലുണ്ടാകുമ്പോഴും സംഭവിക്കുന്നത്. സൂര്യ പ്രകാശമില്ലാതെ ഭൂമിയിൽ ജീവൻ സാധ്യമല്ല. എന്നാൽ സൂര്യനിൽ നിന്ന് പുറപ്പെടുന്ന വലിയ തോതിലുള്ള ഊർജ്ജത്തെ തടഞ്ഞു നിർത്തി നമുക്കാവശ്യമുള്ള അളവിൽ ഭൂമിയിലേയ്ക്ക് കടത്തി വിടുന്ന വലിയൊരു കുടയാണ് ഓസോൺ പാളി. അതുകൂടാതെ മനുഷ്യന് ഹാനികരമായ അൾട്രാ വയലറ്റ് രശ്മികളേയും തടഞ്ഞു നിർത്താൻ ഈ സ്ട്രാറ്റോസ്ഫെറിക് പാളി സഹായിക്കുന്നുണ്ട്. എന്നാൽ 1970 -കളുടെ അവസാനത്തിലാണ് ശാസ്ത്രജ്ഞർ ഭൂമിയുടെ ഈ കവചത്തിന് ദ്വാരങ്ങളുണ്ടാകുന്നു എന്ന് കണ്ടുപിടിക്കുന്നത്. റഫ്രിജറേറ്ററുകൾ, എയർകണ്ടീഷണറുകൾ തുടങ്ങിയവ പുറത്തുവിടുന്ന ഓസോണിനെ തകർക്കുന്ന വാതകങ്ങൾ മൂലമാണ് ഇത് സംഭവിക്കുന്നതെന്നായിരുന്നു പഠനങ്ങൾ. അതിന്റെ ഫലമായി ചർമ്മത്തിലുണ്ടാകുന്ന കാൻസർ, തിമിരം തുടങ്ങിയ ആരോഗ്യ പ്രശ്നങ്ങൾ ഉൾപ്പെടെ നമ്മുടെ സസ്യകളുടെയും പരിസ്ഥിതിയുടെയും സന്തുലിതാവസ്ഥ നശിപ്പിക്കുകയും ചെയ്യുന്ന സ്ഥിതിവിശേഷമുണ്ടാകുന്നു.

1985 ൽ യു. എൻ. വിളിച്ചു ചേർത്ത വിയന്ന ഉച്ചകോടിയിൽ ലോക രാഷ്ട്രങ്ങൾ ഒരുമിച്ച് ചേർന്ന് ഓസോണിനെ തകർക്കുന്ന വാതകങ്ങൾ പുറത്തുവിടുന്ന പദാർത്ഥങ്ങളിൽ 99 ശതമാനവും വെട്ടിമാറ്റാൻ തീരുമാനിച്ചു. പിന്നീടുള്ള പഠനങ്ങളിൽ ഭൂമിയുടെ ഈ രക്ഷാ കവചം സുഖപ്പെടുന്നതായി ശാസ്ത്രജ്ഞന്മാർ കണ്ടെത്തി. അതുകൊണ്ട് തന്നെ ഇതിന്റെ പ്രാധാന്യം ലോകത്തെ ഓർമ്മിപ്പിക്കാനായി എല്ലാ വർഷവും സെപ്റ്റംബർ 16 നു ലോക ഓസോൺ ദിനം ആചരിക്കാൻ ആരംഭിച്ചു. ഒരു പ്രത്യേക കാലയളവിൽ മാത്രം സംരക്ഷിക്കപ്പെടേണ്ട ഒന്നല്ല ഓസോൺ പാളി. ഈ ഭൂമിയിലെ മനുഷ്യർക്കും ജീവജാലങ്ങൾക്കും പ്രകൃതിയ്ക്കും വേണ്ടി എക്കാലവും വളരെ സൂക്ഷ്മതയോടെ സംരക്ഷിക്കപ്പെടേണ്ടതാണ്. അതുകൊണ്ട് തന്നെ വളർന്നു വരുന്ന ഓരോ കുട്ടിയും അറിഞ്ഞിരിക്കേണ്ടത് നമ്മുടെ നിലനിൽപ്പിനു ആധാരമായവയെ സംരക്ഷിക്കേണ്ടതും പോഷിപ്പിക്കേണ്ടതും നമ്മുടെ തന്നെ ഉത്തരവാദിത്വമാണെന്നാണ്. അതിനാൽ തന്നെ 'ഭൂമിയുടെ ഈ കുട'യെ സംരക്ഷിക്കുക എന്നത് സ്വയം സംരക്ഷണമാണെന്നു ഓർമ്മിക്കുക. നമ്മോടും വരും തലമുറയോടുമുള്ള പ്രതിബദ്ധത നമുക്ക് നിറവേറ്റാം. അതുവഴി നമുക്ക് പ്രകൃതിയുടെയും ജീവന്റെയും കാവലാളാകാം.

സ്നേഹപൂർവ്വം

ഫാ. സിജോ ഇളംകുന്നപുഴ
കോർപ്പറേറ്റ് മാനേജർ