അനേകം തലമുറകളുടെ ബാല്യകാല സ്പന്ദനങ്ങൾക്ക് സാക്ഷ്യം വഹിച്ച ഒണ്ടയങ്ങാടി സെന്റ് മാർട്ടിൻസ് എൽ പി സ്കൂളിനായി നിർമിച്ച ആധുനിക വിദ്യാലയ സമുച്ചയം മാനന്തവാടി രൂപതയുടെ മെത്രാൻ അഭിവന്ദ്യ മാർ ജോസ് പൊരുന്നേടം പിതാവ് വെഞ്ചിരിപ്പ് കർമം നിർവഹിച്ച് നാടിന് സമർപ്പിച്ച ഇന്നത്തെ അതിമനോഹരമായ സായാഹ്നം മാനന്തവാടി രൂപത കോർപ്പറേറ്റ് വിദ്യാഭ്യാസ ഏജൻസിയുടെ ചരിത്രനിമിഷങ്ങളിലേക്ക് ചേർത്തുവെക്കപ്പെടുന്നു.
കഴിഞ്ഞ 50 വർഷക്കാലം ഒണ്ടയങ്ങാടി പ്രദേശത്തിന്റെ സാമൂഹിക സാംസ്‌കാരിക വൈജ്ഞാനിക വളർച്ചകൾക്ക് അടിത്തറ പാകിയവർ ഈ വിദ്യാലയങ്കണത്തിൽനിന്നും പ്രാഥമിക വിദ്യാഭ്യാസം കൈവരിച്ച് പടിയിറങ്ങിയ പൂർവവിദ്യാർത്ഥികളും അവർക്കായി അക്ഷരദീപം കെടാതെ സൂക്ഷിച്ച അധ്യാപകരും ചേർന്നായിരുന്നു. ഇന്ന് ഈ പുതിയ മണ്ണിൽ ആധുനിക സാങ്കേതിക വിദ്യകളോട് കൂടിയ ഒരു വിദ്യാഭ്യാസ സ്ഥാപനം ഉയർന്നുവരുമ്പോൾ പിന്നിട്ട വഴികളിൽ ചരിത്രമെഴുതി നടന്നകന്നവർക്ക്...നിത്യതയിലായവർക്ക്.. അപൂർണതകളിൽനിന്നും പൂർണതയിലേക്കുള്ള ഈ യാത്രയിൽ കരം ചേർത്തവർക്ക് ഹൃദയംഗമമായ നന്ദി...

നാഷണൽ ഹൈവേയുടെ സമീപത്ത് നിന്നും അമ്പത് മീറ്റർ മാറി പത്ത് ഹൈടെക് ക്ലാസ്സ്‌മുറികളോട് കൂടിയ രണ്ട് നിലയിലുള്ള പ്രൗഡഗംഭീരമായ കെട്ടിടവും ടോയ്ലറ്റ് ബ്ലോക്കും വാഷിംഗ്‌ ഏരിയയും ലൈബ്രറി സൗകര്യവും അത്യാധുനിക രീതിയിലുള്ള പാചകപ്പുരയും വിശാലമായ കളിസ്ഥലവുമുൾപ്പെടെ അടിമുടി മാറ്റപ്പെട്ട കെട്ടിടസമുച്ചയമാണ് വിദ്യാലയത്തിനായി നിർമിച്ചത്.
പഠനപ്രക്രിയയിൽ പുതുവഴികൾ തേടാനും, കാലത്തിന്റെയും ദേശത്തിന്റെയും മാറിവരുന്ന അഭിരുചികൾക്കും അവബോധങ്ങൾക്കുമനുസരിച്ച് മുന്നേറാനും ഒണ്ടയങ്ങാടി സെന്റ് മാർട്ടിൻസ് എൽ. പി. സ്കൂൾ നവീകരിക്കപ്പെട്ടപ്പോൾ നിർമാണ പ്രവർത്തനങ്ങളിൽ എന്നുമെപ്പോഴും സഹായമായി കൂടെയുണ്ടായിരുന്ന ഫാ. സജി പുതുകുളങ്ങര, വിദ്യാലയം പുതിയ കെട്ടിടത്തിലേക്ക് മാറുമ്പോൾ എല്ലാം പുതുപ്പുത്തനാകണമെന്ന ആഗ്രഹത്തോടെ അതിനായി പ്രയത്നിച്ച വിദ്യാലയത്തിന്റെ പ്രധാനാധ്യാപകൻ വർക്കി സർ, അധ്യാപകർ, പി. ടി. എ. എക്സിക്യൂട്ടീവ് അംഗങ്ങൾ, മറ്റ് രക്ഷിതാക്കൾ, പൂർവ അധ്യാപകർ, പൂർവ വിദ്യാർത്ഥികൾ ഇടവകജനം, മറ്റ് പ്രദേശവാസികൾ ഏവരേയും നന്ദി നിറഞ്ഞ മനസ്സോടെ ഓർക്കുന്നു.

സ്നേഹപൂർവ്വം...

ഫാ. സിജോ ഇളംകുന്നപ്പുഴ
കോർപ്പറേറ്റ് മാനേജർ
മാനന്തവാടി രൂപത

പ്രിയമുള്ളവരേ,

വിദ്യാലയത്തിന്റെ വേരുകൾ സമൂഹത്തിലേക്ക് ആഴ്ന്നിറങ്ങുമ്പോഴാണ് സാമൂഹീകരണ പ്രക്രിയ പൂർത്തിയാകുകയുള്ളൂ എന്ന തിരിച്ചറിവിൽ അഞ്ച് പതിറ്റാണ്ടുകൾക്ക് മുൻപ് തുടക്കം കുറിച്ച ഒണ്ടയങ്ങാടി സെന്റ് മാർട്ടിൻസ് എൽ പി സ്‌കൂളിനായി നിർമ്മിതമായ ഹൈ ടെക് വിദ്യാലയ മന്ദിരം 2023 ന് സെപ്റ്റംബർ 12 ചൊവാഴ്ച വൈകുന്നേരം മൂന്നു മണിക്ക് മാനന്തവാടി രൂപതയുടെ മെത്രാൻ അഭിവന്ദ്യ മാർ ജോസ് പൊരുന്നേടം പിതാവ് ഉദ്ഘാടനം ചെയ്ത് നാടിനു സമർപ്പിക്കുകയാണ്.

സമൂഹത്തിന്റെ അകക്കണ്ണ് തുറക്കാൻ സക്രിയമായ പഠന-പഠ്യേതര പ്രവർത്തങ്ങളിലൂടെ അഞ്ച് ദശാബ്ദക്കാലമായി ഇളം തലമുറകൾക്ക് തണലായി നിലകൊള്ളുന്ന ഈ വിദ്യാലയത്തെ വാർത്തെടുത്ത പൂർവ്വികർക്ക്... കാലാനുസൃതമായ മാസ്റ്റങ്ങൾ ഉൾച്ചേർത്തുകൊണ്ട് വിദ്യാലയത്തിന്റെ മുഖം മിനുക്കിയപ്പോൾ മാനന്തവാടി രൂപതാ കോർപ്പറേറ്റ് വിദ്യാഭ്യാസ ഏജൻസിക്കൊപ്പം കരം കോർത്തവർക്ക് ഹൃദയം നിറഞ്ഞ നന്ദി.

സുവർണ്ണ ജൂബിലി വർഷത്തിൽ നിർമ്മിതമായ ആധുനിക വിദ്യാലയ സമുച്ചയത്തിന്റെ ഉദ്ഘടന നിമിഷങ്ങൾക്ക് സാക്ഷ്യം വഹിക്കാനും കോർപ്പറേറ്റ് വിദ്യഭ്യാസ ഏജൻസിയുടെ ചരിത്ര നിമിഷങ്ങളിൽ ഭാഗഭാക്കാകാനുമായി ഏവരെയും ക്ഷണിക്കുന്നു.

സ്നേഹപൂർവ്വം

ഫാ. സിജോ ഇളംകുന്നപ്പുഴ
കോർപ്പറേറ്റ് മാനേജർ