പ്രിയമുള്ളവരേ,

സാങ്കേതികവിദ്യയുടെ വിസ്മയകരമായ ഒരു കാലത്താണ് നാം ഇന്ന് ജീവിക്കുന്നത്. ഇന്റർനെറ്റും സോഷ്യൽ മീഡിയയുമൊക്കെ നമ്മുടെ വിരൽത്തുമ്പിൽ അത്ഭുതങ്ങൾ തീർക്കുകയാണ്. എന്നാൽ, ഈ ഡിജിറ്റൽ ലോകത്തിന്റെ തിളക്കമാർന്ന മായക്കാഴ്ചകൾക്ക് പിന്നിൽ, നമ്മുടെ തലമുറയെയാകെ ഇരുളിലേക്ക് തള്ളിയിടാൻ പോന്ന മാരകമായൊരു ചതിക്കുഴി ഒളിഞ്ഞിരിപ്പുണ്ട് — അതാണ് ലഹരിയുടെ കറുത്ത ലോകം.

പണ്ടൊക്കെ മയക്കുമരുന്ന് എന്ന് കേൾക്കുമ്പോൾ വിദൂര പ്രദേശങ്ങളിലെ ഏതോ ചില രഹസ്യകേന്ദ്രങ്ങളാണ് നമ്മുടെ ഓർമ്മയിൽ വന്നിരുന്നത്. എന്നാൽ ഇന്ന് അങ്ങനെയല്ല; നമ്മുടെ കൈയ്യിലിരുന്ന സ്മാർട്ട്‌ഫോണുകളിലെ സോഷ്യൽ മീഡിയ ആപ്പുകൾ വഴിയും ഇൻസ്റ്റാഗ്രാം-ടെലിഗ്രാം ഗ്രൂപ്പുകൾ വഴിയും ഈ വിപത്ത് ലക്ഷ്യം വെയ്ക്കുന്നത് നാമോരോരുത്തരെയുമാണ്. തിരിച്ചറിയാൻ പോലും പറ്റാത്തവിധം അതിമനോഹരമായ പേരുകളിലും രൂപങ്ങളിലുമാണ് പുതിയ കാലത്തെ 'സിന്തറ്റിക് മയക്കുമരുന്നുകൾ' വിപണിയിലെത്തുന്നത്. വെറുമൊരു കൗതുകത്തിന് വേണ്ടിയോ, ഒരു നിമിഷത്തെ രസത്തിന് വേണ്ടിയോ നാം വെച്ചുനീട്ടുന്ന ആ ഒരു കൈ, പിന്നീട് നമ്മുടെ ജീവിതത്തിന്റെ സർവ്വ നിയന്ത്രണവും തട്ടിയെടുക്കുമെന്ന യാഥാർത്ഥ്യം നാം മറന്നുപോകരുത്.

അതുകൊണ്ടുതന്നെ, നാം എപ്പോഴും അത്യന്തം ജാഗ്രതയോടെയിരിക്കണം. നിങ്ങളെ വഴിതെറ്റിക്കാനും ഈ മായാവലയത്തിലേക്ക് ആകർഷിക്കാനും ഓൺലൈനിലും ഓഫ്‌ലൈനിലും വലിയൊരു ക്രിമിനൽ ശൃംഖല തന്നെയുണ്ട്. സങ്കേതികവിദ്യയെയും ഇന്റർനെറ്റിനെയും നമ്മുടെ അറിവ് വർദ്ധിപ്പിക്കാനും സ്വപ്നങ്ങൾക്ക് ചിറകു നൽകാനും വേണ്ടി മാത്രം ഉപയോഗിക്കുക. ഡിജിറ്റൽ ലോകത്തെ ഇത്തരം കെണികളിൽ വീഴാതിരിക്കാൻ എപ്പോഴും വിവേകത്തോടെ പ്രവർത്തിക്കുക. നിങ്ങളുടെ മനസ്സിൽ എന്തെങ്കിലും തരത്തിലുള്ള സങ്കടങ്ങളോ, മാനസിക സമ്മർദ്ദങ്ങളോ, ഭയമോ ഉണ്ടെങ്കിൽ അത് അധ്യാപകരോടോ മാതാപിതാക്കളോടോ തുറന്നു പറയാൻ മടിക്കരുത്. പ്രതിസന്ധികളിൽ നിന്നുള്ള ഒളിച്ചോട്ടമല്ല ലഹരി; മറിച്ച്, അതൊരു വലിയ അടിയറവുപറച്ചിലാണ്.

മുൻകാഴ്ചയോടും പുതിയ ചിന്തകളോടും പരസ്പരമുള്ള ഒത്തൊരുമയോടും കൂടി മാത്രമേ നമുക്ക് ഈ ആഗോള വിപത്തിനെ നേരിടാൻ കഴിയൂ എന്നാണ് ഈ വർഷത്തെ ലഹരിവിരുദ്ധ സന്ദേശം നമ്മെ ഓർമ്മിപ്പിക്കുന്നത്. ചുരുക്കത്തിൽ, ലഹരിമാഫിയ കൂടുതൽ സ്മാർട്ടാകുമ്പോൾ, അതിനെ നേരിടാൻ അതിനേക്കാൾ ബുദ്ധിപരവും ആധുനികവുമായ പ്രതിരോധ മതിൽ തീർക്കാൻ നമുക്ക് സാധിക്കണം.

ഓരോ ജീവനും ജീവിതവും വളരെ വിലപ്പെട്ടതാണ്. മാതാപിതാക്കൾക്കും ഈ സമൂഹത്തിനും നിങ്ങളെക്കുറിച്ച് ഒട്ടനവധി വലിയ സ്വപ്നങ്ങളുണ്ട്. ആ സുന്ദരമായ ഭാവി ഏതെങ്കിലും ഒരു ലഹരിവസ്തുവിന് മുന്നിൽ തോറ്റുകൊടുക്കാനുള്ളതല്ല. എപ്പോഴും സുരക്ഷിതരായിരിക്കുക, തെറ്റായ വഴികളിലേക്ക് വിരൽ ചൂണ്ടുന്ന സൗഹൃദങ്ങളെ ധൈര്യത്തോടെ അകറ്റി നിർത്തുക. ലഹരിയുടെ താല്ക്കാലിക ഹരങ്ങളോട് 'വേണ്ട' എന്ന് പറയാനും, സ്വന്തം ജീവിതത്തോട് 'വേണം' എന്ന് പറയാനുമുള്ള ആർജ്ജവവും ചങ്കൂറ്റവും നമുക്കുണ്ടാകട്ടെ.

സ്നേഹപൂർവ്വം,

ഫാ. സിജോ ഇളംകുന്നപ്പുഴ
കോർപ്പറേറ്റ് മാനേജർ