പ്രിയമുള്ളവരേ,

ഡിസംബർ ഒരു പുണ്യമാസമാണ്. ആത്മ ത്യാഗത്തിന്റെയും കാത്തിരിപ്പിന്റെയും ഒരു കാലഘട്ടം. ക്രിസ്തുവിന്റെ ജനനത്തിന്റെ ഓർമ്മ ലോകം മുഴുവൻ പ്രാർത്ഥനയോടെയും സന്തോഷത്തോടെയും വരവേൽക്കുമ്പോൾ ക്രിസ്തുമസ് നൽകുന്ന യഥാർത്ഥ സന്ദേശത്തെയാണ് നാം മുറുകെ പിടിക്കേണ്ടത്. നൽകലിന്റെയും വിട്ടുകൊടുക്കലിന്റെയും സൗഹാർദ്ദത്തിന്റെയും ഒരു ഓർമ്മപ്പെടുത്തൽകൂടിയാണ് ക്രിസ്തുമസ്. ദൈവം തന്റെ ഏകജാതനെ ലോകത്തിനു നൽകുകയാണ് ചെയ്തത്. അവിടെ നൽകലും വിട്ടുകൊടുക്കലും ഒന്ന് ചേർന്നപ്പോൾ സ്നേഹം ജനിക്കുകയാണ് ചെയ്തത്.

ക്രിസ്തുവിന്റെ പിറവിയിലൂടെ ലോകത്തിനു ലഭിച്ചത് സമാധാനത്തിന്റെ സദ്‌വാർത്തയാണ്. അത് നമ്മിലെത്തണമെങ്കിൽ വിട്ടുകൊടുക്കാൻ പാകമായ ഒരു മനസ്സാണ് ആവശ്യം. ജീവിതത്തിൽ പകയും വാശിയും വെറുപ്പുമൊക്കെ നിറഞ്ഞ ഏടുകളുണ്ടാകാം. അവയെല്ലാം പറിച്ചെറിഞ്ഞു ദയയും സമാധാനവും സന്തോഷവും തുന്നിച്ചേർക്കുക. സ്നേഹത്തിന്റെ പുൽത്തകിടിയിൽ നാം മറ്റുള്ളവർക്ക് ഇരിപ്പിടമൊരുക്കുമ്പോൾ ത്യാഗത്തിന്റെ മലരുകളും സൗരഭ്യവുമാണ് പരക്കുന്നത്. ഈ ക്രിസ്തുമസും നമ്മെ ഓർമ്മിപ്പിക്കുന്നത് ഇതൊക്കെയാണ്. ലോകത്തിന്റെ മായാവലയങ്ങൾ തീർക്കുന്ന തീച്ചൂളയിലേയ്ക്ക് മനസ്സ് പായിക്കാതെ നിഷ്കളങ്കതയുടെയും സ്നേഹത്തിന്റെയും പ്രഭാവലയത്തിൽ മറ്റുള്ളവരെകൂടി പൊതിഞ്ഞു സൂക്ഷിക്കേണ്ട കർത്തവ്യം നമ്മിൽ ഓരോരുത്തരിലുമുണ്ടെന്നു വിശ്വസിക്കുക. കളങ്കമേശാത്ത ഒരു ജീവിതം നയിക്കാൻ ഈ തിരുപിറവി നമ്മെ സഹായിക്കട്ടെ. വിശുദ്ധമായതു സ്വീകരിക്കുമ്പോൾ ചിന്തയും പ്രവർത്തിയും പരിശുദ്ധമായി മാറും. ക്രിസ്തുമസ് നൽകുന്ന നന്മയുടെ അംശങ്ങൾ സ്നേഹമായും സഹോദര്യമായും സഹാനുഭൂതിയായും മൂല്യങ്ങളായും നാം കൈമാറ്റം ചെയ്യുമ്പോൾ മണ്ണിൽ നാം ഓരോരുത്തരുടെയും രൂപത്തിൽ യേശു ഒരിക്കൽക്കൂടി തിരുപ്പിറവിയെടുക്കുന്നു.

മറ്റുള്ളവരെ ഹൃദയത്തിലേക്ക് സ്നേഹപൂർവ്വം ചേർത്ത് നിർത്തിക്കൊണ്ട് ക്രിസ്തുമസ് നൽകുന്ന ശാന്തിയുടെയും സമാധാനത്തിന്റെയും വാഹകരാകുവാൻ നമുക്ക് സാധിക്കട്ടെ. ഏവർക്കും നന്മയുടെയും സ്നേഹത്തിന്റെയും പൊൻ തൂവലിൽ നെയ്തെടുത്ത ഒരായിരം ക്രിസ്തുമസ്- പുതുവത്സരാശംസകൾ !

സ്നേഹപൂർവ്വം

ഫാ. സിജോ ഇളംകുന്നപുഴ
കോർപ്പറേറ്റ് മാനേജർ