പ്രിയമുള്ളവരേ,

മലയാളിയുടെ ചിരിയും ചിന്തയും കണ്ണീരും തന്റെ മാസ്മരിക തൂലികയിലൂടെ ആവാഹിച്ചെടുത്ത കഥകളുടെ 'സുൽത്താൻ' വൈക്കം മുഹമ്മദ് ബഷീർ ഓർമ്മയായിട്ട് മൂന്നു പതിറ്റാണ്ടുകൾ പിന്നിടുകയാണ്. വിയോഗത്തിന്റെ ഈ ദീർഘവേളയിലും, അദ്ദേഹത്തിന്റെ വാക്കുകൾക്ക് ഇന്നും ഓർമ്മകളുടെ സുഗന്ധവും ജീവിതത്തിന്റെ ചൂടുമുണ്ട്. സാഹിത്യകാരൻ എന്നതിനപ്പുറം ഒരു സ്വാതന്ത്ര്യ സമര സേനാനിയായും, ലോകത്തെ സകല ജീവജാലങ്ങളെയും ഒരേ കണ്ണോടെ കണ്ട വലിയൊരു മാനവികതാവാദിയായുമാണ് നാം ബഷീറിനെ ഓർക്കുന്നത്. സാധാരണക്കാരന്റെ ഭാഷയെ സാഹിത്യത്തിന്റെ വലിയ ഉയരങ്ങളിലേക്ക് നയിച്ച 'ബഷീറിയനിസം' എന്ന വേറിട്ട ശൈലി മലയാളത്തിന് അദ്ദേഹം സമ്മാനിച്ച ഏറ്റവും വലിയ നിധിയാണ്.

അക്കാലത്തെ പരമ്പരാഗത സാഹിത്യ സങ്കൽപ്പങ്ങളെ കാറ്റിൽപ്പറത്തിക്കൊണ്ടാണ് 'തങ്കം' എന്ന തന്റെ ആദ്യ കഥയിലൂടെ വിരൂപയായ നായികയെയും യാചകനായ നായകനെയും അദ്ദേഹം അവതരിപ്പിച്ചത്. സമൂഹത്തിന്റെ താഴേത്തട്ടിലുള്ള മനുഷ്യരുടെ ജീവിത വൈവിധ്യങ്ങളെ ഇത്രമാത്രം ആഴത്തിൽ അടയാളപ്പെടുത്തിയ മറ്റൊരു എഴുത്തുകാരൻ ലോകസാഹിത്യത്തിൽ തന്നെ അപൂർവ്വമാണ്. 'ച്ചിരിപ്പിടിയോളം ബുദ്ധിവെച്ച് ആലോചിച്ചു നോക്കുമ്പോൾ അത്ഭുതകരവും സുന്ദരവുമായ മഹാ സംഭവമാകുന്നു ജീവിതം' എന്ന് നമ്മെ പഠിപ്പിച്ച ദാർശനികനായിരുന്നു അദ്ദേഹം. 'കുന്ത്രാപ്പി ബുസോട്ട', 'ചപ്ലാച്ചി', 'ഗഡാ ഗഡിയൻ' തുടങ്ങിയ അർത്ഥമില്ലാത്ത വാക്കുകൾക്ക് പോലും മലയാളിയുടെ ഹൃദയത്തിൽ അർത്ഥപൂർണ്ണമായ സ്ഥാനം നൽകാൻ അദ്ദേഹത്തിന്റെ നാടൻ പ്രയോഗങ്ങൾക്ക് സാധിച്ചു.

പൂച്ചയും ആടും പാമ്പും മുതൽ നാം ദിവസവും കാണുന്ന സാധാരണക്കാരായ മനുഷ്യർ വരെ ബഷീറിന്റെ രചനകളിൽ കഥാപാത്രങ്ങളായി മാറി. പ്രകൃതിയിലെ എല്ലാ ജീവജാലങ്ങൾക്കും ഇവിടെ ജീവിക്കാൻ അവകാശമുണ്ടെന്ന 'ഭൂമിയുടെ അവകാശികൾ' എന്ന ലളിത പ്രയോഗത്തിലൂടെ വലിയൊരു പരിസ്ഥിതി ദർശനമാണ് അദ്ദേഹം നമുക്ക് പകർന്നുതന്നത്. 'ഒന്നും ഒന്നും ഉമ്മിണി വലിയ ഒന്ന്' എന്ന് കണക്കുകൂട്ടിയ മജീദും സുഹ്റയും, പാത്തുമ്മയും അവളുടെ ആടും, ആനവാരി രാമൻ നായരും, പൊൻകുരിശ് തോമായും എല്ലാം ഇന്നും നമുക്കിടയിൽ ജീവിക്കുന്നു. കടിച്ചാൽ പൊട്ടാത്ത വാക്കുകളല്ല, മറിച്ച് ഹൃദയത്തിൽ നിന്ന് വരുന്ന ലളിതമായ മൊഴികളാണ് സാഹിത്യത്തിന്റെ ജീവനെന്ന് അദ്ദേഹം തെളിയിച്ചു.

തന്റെ പ്രിയപ്പെട്ട മാങ്കോസ്റ്റിൻ മരച്ചുവട്ടിലെ ചാരുകസേരയിലിരുന്ന്, ഗ്രാമഫോണിൽ പങ്കജ് മല്ലിക്കിന്റെയും സൈഗാളിന്റെയും ഗാനങ്ങൾ ആസ്വദിച്ചിരുന്ന ആ വെളുത്ത വസ്ത്രധാരിയായ ബേപ്പൂർ സുൽത്താന്റെ രൂപം മലയാളിയുടെ വായനാലോകത്ത് എന്നും തിളങ്ങിനിൽക്കും. ഹൃദയങ്ങൾക്കിടയിൽ മതിലുകളില്ലാത്ത, ക്ഷമയും കാരുണ്യവുമുള്ള ഒരു നല്ല നാളെയെ സ്വപ്നം കാണാൻ നമ്മെ പഠിപ്പിച്ച 'ഇമ്മിണി ബല്യ കഥാകാരന്റെ' ഓർമ്മകൾക്ക് മുൻപിൽ മാനന്തവാടി രൂപതാ വിദ്യാഭ്യാസ ഏജൻസിയുടെ ആദരപൂർവ്വമായ പ്രണാമം!

ഫാ. സിജോ ഇളംകുന്നപ്പുഴ
കോർപ്പറേറ്റ് മാനേജർ