Thank You

നടവയലിലേയ്ക്ക് തിരുവിതാംകൂറിൽ നിന്ന് കുടിയേറ്റം ആരംഭിച്ചത് 1948 മുതലാണ്.വിദ്യാലയം നാടിന്റെ പുരോഗതിയുടെ അനിവാര്യതയാണെന്ന് കണ്ടെത്തിയവർ റവ. ഫാ. നസ്രത്തിന്റെ നേതൃത്വത്തിൽ ഒന്ന് ചേർന്നു .അന്നത്തെ മലബാർ ജില്ലയുടെ ചട്ടമനുസരിച്ച് അപേക്ഷ നൽകി. അതിന്റെ ഫലമായി 1950 ജൂലൈ 10ന് സെന്റ്.തോമസ് ആർ. സി സ്കൂൾ സ്ഥാപിക്കപ്പെട്ടു. ഒന്നും രണ്ടും ക്ലാസുകൾ തുടങ്ങി. കണിയാമ്പറ്റക്കാരൻ റിട്ടയേഡ് അധ്യാപകൻ ശ്രീ വെങ്കിട്ടരാമയ്യർ (പട്ടര് സർ) അധ്യാപനത്തിന്റെ ചുമതലയേറ്റു.

അതേവർഷം ഒക്ടോബറിൽ മലബാർ ജില്ലയിലെ വിദ്യാഭ്യാസ ഉപമേധാവി നടവയലിലെ ഏക അധ്യാപക വിദ്യാലയം സന്ദർശിക്കുകയും ലോവർ എലിമെന്ററി സ്കൂളിന് അംഗീകാരം നൽകുകയും ചെയ്തു. 1951 ജനുവരിയിൽ മൂന്നാം ക്ലാസും ആരംഭിച്ചു .പ്രത്യേക അനുവാദം വാങ്ങി ഇടക്കാല പരീക്ഷ നടത്തിയാണ് ഇത് സാധിച്ചത് .പഠിപ്പ് മുടങ്ങിയ പല പ്രായപരിധിയിലുള്ള കുട്ടികൾക്ക് ഇത് അനുഗ്രഹമായി. അടുത്ത ജൂണിൽ നാലാം ക്ലാസും ആരംഭിച്ചു. 1952 ൽ അഞ്ചാം ക്ലാസും തുടങ്ങിയതോടെ അന്നത്തെ ലോവർ എലിമെന്ററി പൂർത്തിയായി.1953 ജൂലൈ ഒന്നാം തീയതി ശ്രീ കെ .ജെ അഗസ്റ്റിൻ കരീക്കുന്നേൽ എച് എം ആയി നിയമിക്കപ്പെട്ടു. ഒരു കൊല്ലത്തെ ഇടവേളക്കുശേഷം 1954 ഹയർ എലിമെന്ററി (ആറാം ക്ലാസ് തുടങ്ങി എട്ടാം ക്ലാസ് വരെ) ആരംഭിച്ചു.

1956 - (ESLC )എലിമെന്ററി സ്കൂൾ ലീവിങ് സർട്ടിഫിക്കറ്റ് കഴിഞ്ഞതോടെ തങ്ങളുടെ മക്കളെ ഉന്നത വിദ്യാഭ്യാസത്തിനായി എവിടെ അയയ്ക്കും എന്ന ചിന്തയിലായി കുടിയേറ്റക്കാർ . സമീപപ്രദേശങ്ങളിൽ നിന്ന് ഒന്നും തന്നെ ഹൈസ്കൂൾ ഇല്ല . ആകെയുള്ളത് കൽപ്പറ്റയിലും മാനന്തവാടിയിലും ബത്തേരിയിലുമാണ്.

അന്നത്തെ സ്കൂൾ മാനേജരും വികാരിയുമായിരുന്ന റവ.ഫാദർ ടിഷ്യാന്റെ നേതൃത്വത്തിൽ ഹൈസ്കൂൾ തുടങ്ങുന്നതിന് കഠിനശ്രമം ആരംഭിച്ചു.ഒടുവിൽ നടവയലിന് ഹൈസ്കൂൾ അനുവദിച്ചു കിട്ടി. കുടിയേറ്റ ജനതയുടെ നിശ്ചയദാർഢ്യത്തിന്റെയും കഠിനാധ്വാനത്തിന്റെയും അർപ്പണമനോഭാവത്തിന്റെയും തെളിവാണ് സെൻറ് തോമസ് ഹൈസ്കൂൾ . ഈ വിദ്യാലയത്തിന് പ്രഥമ ഹെഡ്മാസ്റ്ററായി ശ്രീ. കെ.ജോർജ് ജോസഫ് ചുമതല ഏറ്റു. സമീപപ്രദേശങ്ങളിൽ ഹൈസ്കൂൾ ഇല്ലാത്തതിനാൽ കോളേരി, കേണിച്ചിറ, പുൽപ്പള്ളി, മുള്ളൻകൊല്ലി തുടങ്ങിയ സ്ഥലങ്ങളിൽ നിന്നും കുട്ടികൾ നടവയലിലേക്ക് വന്നുതുടങ്ങി. വനത്തിലൂടെയുള്ള അവരുടെ യാത്ര ദുഷ്കരമായിരുന്നു.

ഹൈസ്കൂൾ സ്ഥാപിതമായതോടെ യുപി വിഭാഗം ഹൈസ്കൂളിനോട് ചേർക്കപ്പെടുകയും സെൻറ് തോമസ് എൽ.പി സ്കൂൾ എന്ന പേരിൽ അഞ്ചാം ക്ലാസ് വരെയുള്ള പ്രൈമറി സ്കൂൾ ആയി മാറുകയും ചെയ്തു. സിസ്റ്റർ അച്ചാമ്മ പി.ടി (സിസ്റ്റർ ബോസ്കോ ) സെൻറ് തോമസ് എൽ പി സ്കൂളിലെ ഹെഡ്മിസ്ട്രസ് ആയി ചാർജ് എടുക്കുകയും ചെയ്തു.

1957 - ൽ ഒൻപതാം ക്ലാസ്സിൽ അഡ്മിഷൻ നേടിയ വിദ്യാർത്ഥികൾ പത്താംതരം, പതിനൊന്നാം തരം (ഫോർത്ത് ഫോറം) വരെ ഇവിടെ      പഠിച്ചു .ഈ പ്രഥമ ബാച്ചിന് 75% വിജയം നേടാൻ കഴിഞ്ഞു. 1962ലെ വിദ്യാഭ്യാസ പരിഷ്കരണത്തോടെ അഞ്ചാം ക്ലാസ് യു പി വിഭാഗത്തിലേക്ക് ചേർക്കുകയും ഒന്നു മുതൽ നാലുവരെയുള്ള ക്ലാസുകൾ    എൽ .പി വിഭാഗത്തിൽ നിലനിർത്തുകയും ചെയ്തു.

സെന്റ്തോമസ് ഹൈസ്കൂളിലെ സുവർണ്ണ ജൂബിലി ആഘോഷം 2006 ആഗസ്റ്റ് -15ന് മാനന്തവാടി രൂപതയുടെ വികാരി ജനറാൾ മോൺ. ജോർജ് മൂലയിൽ 50 വൃക്ഷത്തൈകളിൽ ഒന്നു നട്ട് ഉദ്ഘാടനം ചെയ്തു.

1957 ജൂൺ 20 -ന് 20 കുട്ടികളും 7 അധ്യാപകരുമായി തുടങ്ങിയ സെന്റ് തോമസ് ഹയർ സെക്കൻഡറി സ്കൂളിൽ 18 പ്രധാന അധ്യാപകരും 300 ലധികം അധ്യാപക- അനധ്യാപകരും സേവനമനുഷ്ഠിച്ചിട്ടുണ്ട്. ഇന്ന് ആയിരത്തോളം കുട്ടികളും 38 അധ്യാപകരും 5 അനധ്യാപകരുമായി വയനാട്ടിലെ മുൻനിര സ്കൂളുകളുടെ പട്ടികയിൽ ഇടം പിടിച്ചിരിക്കുന്നു.ഇതിൽ 8 പേർ ഈ സ്കൂളിലെ പൂർവ്വ വിദ്യാർത്ഥികൾ ആണെന്നത് അഭിമാനകരമാണ്. 

2010-സെന്റ് തോമസ് ഹൈസ്കൂൾ ഹയർ സെക്കൻഡറി ആയി ഉയർത്തപ്പെട്ടു. ഈ വിദ്യാലയത്തിലെ വിദ്യാർത്ഥികൾ കലാ-കായിക- ശാസ്ത്ര- ഗണിത ശാസ്ത്ര - സാമൂഹ്യശാസ്ത്ര - -പ്രവൃത്തി പരിചയ -ഐ.ടി മേളകളിൽ സബ്ജില്ലാ -ജില്ലാ - സംസ്ഥാന -ദേശീയ തലങ്ങളിൽ മികവ് തെളിയിച്ചിട്ടുണ്ട്. 'നീഹാരം',' നദിക' എന്നീ വാർഷികപതിപ്പുകളും 2010- 11 വർഷങ്ങളിൽ പ്രസിദ്ധീകരിച്ചു. 2012 ജൂൺ മുതല് 'മഷിത്തണ്ട് ' ,'വാർത്താ പത്രിക' പ്രസിദ്ധീകരിച്ചു . 2014- 15 വർഷം SSLC പരീക്ഷ എഴുതിയ 171 കുട്ടികളെയും വിജയിപ്പിച്ച് 100% വിജയം ആദ്യമായി നാം സ്വന്തമാക്കി .2016 - 17 ൽ വിദ്യാലയത്തിന്റെ വജ്ര ജൂബിലി വിവിധ പരിപാടികളോടെ ആഘോഷിച്ചു .പൂർവ്വ വിദ്യാർത്ഥികളുടെ നേതൃത്വത്തിൽ വജ്ര ജൂബിലി സ്മാരകമായി ഓപ്പൺ സ്റ്റേജ് നിർമ്മിച്ചു 'ഓർമ്മപ്പച്ച' എന്ന പേരിൽ സ്മരണിക പുറത്തിറങ്ങി.

ഇപ്പോൾ ആർച്ച് പ്രീസ്റ്റ് റവ.ഫാ.ഗർവാസിസ് മറ്റം മാനേജറും ശ്രീ. വർഗീസ് ഇ. കെ പ്രധാന  അധ്യാപകനുമാണ്.നിലവിൽ വിദ്യാർത്ഥികളുടെ ശാരീരികവും മാനസികവും ബൗദ്ധികവുമായ ഉയർച്ചയ്ക്ക് വേണ്ടിയും മികച്ച പഠനാന്തരീക്ഷം ലഭ്യമാക്കുന്നതിന് വേണ്ടിയും സ്കൂളിൽ എൻ സി സി, ജെ ആർ സി,സ്കൗട്ട് &ഗൈഡ്സ് ,ലിറ്റിൽകൈറ്റ്സ്, നല്ല പാഠം, ഹരിത ക്ലബ് തുടങ്ങിയ യൂണിറ്റുകളും സജീവമായിട്ടുണ്ട്.